“တွေးမိတိုင်း အရိုးနာသည် အမျိုးပါ ဆဲချင်ပေါ့လေး။”
အချုပ်တန်းဆရာဖေ
၁၂ဝဝ-၁၂၅၆
အချုပ်တန်းရပ်ကို အစွဲပြုပြီး အချုပ်တန်းမောင်ဖေ၊ နောက်တော့ အချုပ်တန်းဆရာဖေ ရယ်လို့ နာမည်ကျော်ကြားခဲ့တဲ့ မျိုးချစ်စာဆိုတော်ကြီးက ကိုယ့်အမျိုးသားတွေကို စည်းကမ်းရှိစေချင်လွန်းလို့၊ ညီညွတ်ကြစေချင်လွန်းလို့ အားမလို အားမရဖြစ်ပြီး ရေးခဲ့တဲ့ တေးထပ်တပုဒ်ကို သတိရမိကြဦးမှာပါ။
အချုပ်တန်းဆရာဖေ က မြန်မာသက္ကရာဇ် ၁၂ဝဝ ပြည့်နှစ်ဖွား အင်းဝဇာတိပါ။ ဆရာဖေ ရဲ့မိခင်က သဘင်သည်မျိုးရိုး ဖြစ်ပါတယ်။ ပုဂံမင်းလက်ထက်မှာ အသုံးတော်ခံစာရေးအဖြစ် အမှုထမ်းတဲ့ ဖခင် ဦးရောက်နဲ့အတူတူ အမရပူရမြို့ကို မိသားစု လိုက်ပါခဲ့ကြတယ်။
ပုဂံမင်း နန်းကျပြီး မင်းတုန်းမင်း နန်းတက်တော့ ပုဂံမင်း လက်ထက်က အမှုထမ်းတွေ အနားယူရတဲ့အထဲမှာ ဦးရောက် လည်းပါခဲ့တယ်။ ဆရာဖေတို့မိသားစုက အချုပ်အလုပ်ပညာတတ်ကျွမ်းကြတော့ စားဝတ်နေရေး အတွက် ဆရာဖေ ငယ်စဉ်ကတည်းက မိသားစုနဲ့ ဒိုးတူပေါင်ဖက် လုပ်ကိုင်စားသောက်ခဲ့ရတယ်။
မင်းတုန်းမင်းကြီးက မန္တလေးမြို့သစ်တည်တဲ့အခါ၊ အမရပူရမြို့က လိုက်ပါပြောင်းရွေ့ချင်တဲ့ မြို့သူ မြို့သားတွေကို လုပ်ငန်းချင်း တူရာ တူရာ အလိုက် အစုတွေ၊ ရပ်ကွက်တွေ၊ ဝင်းကြီးတွေမှာ နေရာချထားပေးခဲ့တယ်။ ဒီနေ့အထိပဲ မန္တလေးမြို့ရဲ့ရပ်ကွက်တွေကို တန်း၊ ဝင်း၊ ရပ်၊ စု လို့ ခေါ်ပါသေးတယ်။
စိတ္တရမဟီ လို့ ခေါ်တဲ့ မန္တလေးမြို့ ကျုံးတောင်ဘက်ထိပ်က အချုပ်တန်းကို ဆရာဖေတို့ မိသားစု ပြောင်းရွှေ့ နေထိုင်ပါတယ်။ ဆရာဖေနဲ့မိသားစုက ဘဝရပ်တည်ရေးအတွက် အပ်ချုပ်အလုပ်တွေကို လုပ်ကိုင်စားကြ ရသူတွေမို့၊ အချုပ်တန်းမှာ နေရာရပါတယ်။ အချုပ်တန်း ဆိုတာ အပ်ချုပ်သည်တွေနေတဲ့ ရပ်ကွက်ပါ။ အပ်ချုပ်တန်းလို့လည်း ခေါ်ပါတယ်။ မြင်းကုန်းနှီးတန်း လို့လည်း ခေါ်ပါတယ်။
ဝါသနာပါတဲ့ စာပေကိုလည်း တဖက်က ရေးနေတော့၊ ဆရာဖေ ရဲ့စာတွေကို လူကြိုက်များလာတယ်။ အချုပ်တန်းရပ် ကိုအစွဲပြုပြီး အချုပ်တန်းမောင်ဖေ၊ ဒီနောက်တော့ အချုပ်တန်းဆရာဖေ လို့ နာမည်ကျော်ခဲ့တယ်။ ဆရာဖေ ရဲ့စာတွေက လေးချိုးနဲ့ တေးထပ်တွေပဲ များတယ်။ ဇာတ်စာတွေရေးတာမှာ ပြောင်မြောက်လေတော့ ဇာတ်ပညာရှင် အသိုင်းအဝိုင်းမှာ ကျော်ကြားခဲ့ပြီး အသက် ၂ဝ အရွယ်ကတည်းက ငယ်ငယ်ရွယ်ရွယ်နဲ့ ဆရာ နာမည်တပ်ပြီး အခေါ်ခံခဲ့ရသူပါပဲ။
ဇာတ်စာတွေအရေးများပြီး ဘုရင်ကလည်း သိပ်ပြီး မမြှောက်စားလို့ ဆရာဖေ ရဲ့ စာတွေက ခေတ်ပြိုင်စာဆို စလေဦးပုည ရဲ့ စာတွေလောက် လူသိမများခဲ့ပါ။ ဆရာဖေ က စာဆိုပြိုင်ဖက် စလေဦးပုညထက် အသက် ၁ဝ နှစ် ငယ်ပါတယ်။ စလေဦးပုညကို မင်းတုန်းမင်းကြီးကပဲ ဆရာဦးပုည လို့ ခေါ်လေ့ရှိပါသတဲ့။ နောက်တော့မှသာ စလေဆရာ ဦးပုည လို့ ခေါ်လာကြတယ်လို့ မှတ်သားဖူးပါတယ်။
‘ဘယ်နဲ့ရေးတဲ့ မောင်ပုတ်စည်၊ ဆန်တပြည် တေးတပုဒ်’ လို့စာဆိုရှိပြီး၊ ငယ်နာမည် မောင်ပုတ်စည် လို့ခေါ်တဲ့ စလေဆရာဦးပုည ကတော့ ဘုရင့်မြှောက်စားခံရသူပီပီ အဆင်ပြေခဲ့တယ်။ အဲဒီအချိန်မှာ ဆရာဖေကတော့ အလုပ်မျိုးစုံအောင် လုပ်ကိုင်စားခဲ့ရတယ်။
စာစပ် စာဆို ပြိုင်ဘက်ဖြစ်လာတော့ စလေဦးပုညနဲ့ ဆရာဖေတို့ တဦးနဲ့တဦးအပေါ် ကိုယ်ရည်သွေးတဲ့စာတွေ၊ တဖက်သားကို နှိမ့်ချကဲ့ရဲ့တဲ့ စာတွေ အပြန်အလှန်ရေးကြတယ်။ ဒါပေမယ့် ဆရာဖေ ရဲ့ စာတွေမှာ ဂမ္မဒေါသ ကိုရှောင်ပြီး ရေးလေ့ရှိတာကို တွေ့ရပါတယ်။
“ခါးတောင်းကျိုက် ပိတုန်းပိတ်ကယ်နှင့် ကျုံးထိပ်က ငဖေ၊ ကုန်းပြိတ္တ တစ္ဆေလို အသရေ ဟိတ်နွမ်း။”
စလေဦးပုည
လူပုံသဏ္ဌာန်ရော နေတဲ့အရပ်ပါမကျန်အောင်၊ စာဆိုပြိုင်ဖက် စလေဦးပုည ရဲ့ ရင့်ရင့်သီးသီး စာချိုးတာကို ခံခဲ့ရပါတယ်။ မက္ခရာမင်းသားဆီမှာ ပုဆိုးခါးတောင်းကျိုက်နဲ့ ဆရာဖေ ဓားထမ်းပြီး အဆောင်ကိုင်အဖြစ် အမှုထမ်းနေတာကိုမြင်တဲ့အခါ စာဆိုပြိုင်ဖက် စလေဦးပုည က အချက်ကောင်းယူပြီး ခါးတောင်းကျိုက်နဲ့ ဆရာဖေရဲ့ပုံကိုဖော်ပြီး နှိမ့်ချလို့ စာဖွဲ့လိုက်တာပါပဲ။ လူအများ လေးစား ကြည်ညို အားကိုးကြတဲ့ မက္ခရာမင်းသား ဆီမှာ ဆရာဖေ အမှုထမ်းတာကတော့ မင်းသားကို ကြည်ညိုရင်းစွဲရှိပြီး ခံယူချက်ချင်းလည်းတူညီလို့ ဖြစ်ပါလိမ့်မယ်။
ဆရာဖေရဲ့ ရုပ်ရည်က လူချောလူလှတဦး မဟုတ်ပေမယ့် စလေဦးပုည စာချိုးသလောက်တော့ အရုပ်မဆိုးလှဘူး လို့ သူ့အဆက်အနွယ်တွေက အစဉ်အဆက်ပြောခဲ့ကြတယ်။ နန်းတွင်းပန်းချီဆရာကြီး ဦးစောမောင် ဆွဲခဲ့တဲ့ ပုံတူတခုကလွဲရင် သက်သေပြစရာတော့ မရှိကြပါ။
ရန်ဝင်း (တောင်တံခါး)
အချုပ်တန်းဆရာဖေ
၁၂ဝဝ-၁၂၅၆
ပန်းချီ-ဦးရဲသောင်း သရုပ်ဖော် ရေးဆွဲတယ်။
ဆရာဖေနဲ့ စလေဦးပုညတို့ အပြန်အလှန် စာစပ်ကြ စာချိုးကြပြီး၊ ကဗျာတိုက်ပွဲဖြစ်လာရတဲ့ အကြောင်းရင်း ကတော့၊ နာမည်ကျော် ယင်းတော်မလေးဇာတ်မှာ အဆိုပိုင်လှတဲ့ ယင်းတော်မလေး ဆိုလိုက်လို့ နာမည် သိပ်ကြီးသွားတဲ့ ဆရာဖေ ရဲ့ ကြင်ဖော်ကွဲ့လေးချိုး ငိုချင်းတပုဒ်ကို ဦးပုည က စာပြောင် ကဗျာလှောင် ဖျက်ရေးတာက စပါတယ်။
“သည်ဘဝ သည်မျှနဲ့တန်ရပေ။
နောင်ဘဝသော်မှ၊ မောင်လှကိုပိုလို့ချစ်မယ်၊ မျိုးစစ်တဲ့ဆွေ။
ဗုဒ္ဓဟေ ညောင်ရွှေကွဲ့သဖန်း။
ပွင့်ဝတ်ကယ် ညှာတံကြွေမှ၊ လွဲသွေကြစတမ်း။ ။”
အချုပ်တန်းဆရာဖေ
အဲဒီ ဆရာဖေ ရဲ့ နာမည်ကျော် ကြင်ဖော်ကွဲ လေးချိုးကို ဦးပုည ဖျက်ရေးတဲ့ စာပြောင် ကဗျာလှောင်က အင်မတန် ဂမ္မဒေါသ သင့်နေတယ်။ ဆရာဖေကတော့ ရိုင်းလိုက်လေကွယ်လို့သာ ဆိုပါသတဲ့။ အဲဒီ ကြားရသူ ရှက်စဖွယ် စာပြောင် ကဗျာလှောင်ကို နာမည်ကြီး ရုပ်သေးဆရာ ဦသာဗျော က ဆိုလိုက်ပြန်တော့၊ ပရိတ်သတ်အများ ချစ်ခင်တဲ့ ယင်းတော်မလေး နဲ့ ဆရာဖေ ရဲ့ အများကြိုက်တဲ့စာကိုပါ မဖွယ်မရာ လုပ်မိရာ ရောက်သွားတယ်။
အဲဒီမှာတင်ပဲ၊ စာကောင်းကို ဖျက်ရမလားလို့ ပရိတ်သတ်က စိတ်မကောင်းဖြစ်ကြပြီး၊ ကဗျာလှောင်သီချင်းကို ဆိုမိတဲ့ ရုပ်သေးဆရာ ဦသာဗျော လည်း နာမည်ကျဆင်းသွားခဲ့ပါတော့တယ်။ ဦးပုည နဲ့ ဆရာဖေ တို့ နှစ်ဦးစလုံးရဲ့ စာတွေကိုသုံးနေတဲ့ ယင်းတော်မလေး ကလည်း ဦးပုည ဆီက ဘာစာကိုမှ ထပ်ပြီးမတောင်းတော့ပါ။ အများပြည်သူတွေက မေတ္တာထားလို့ ကြည်ညိုကြတဲ့သူကို နင်ပဲငဆ မစော်ကားမိကြစေဖို့ သင်ခန်းစာ ယူစရာပါပဲ။ ဆရာဖေက မရိုင်းပါ။ ဒီလောက်ပဲပြန်ရေးခဲ့ပါတယ်။
“ကဗျာလှောင် နဘေ တေးကို၊ ဆရာယောင် စလေ က ရေးတယ်တဲ့ဗျာ၊ တွေးဆသင့်ကြောင်း။”
အချုပ်တန်းဆရာဖေ
ဆရာဖေ ရဲ့ စာတွေကို ဖတ်ကြည့်ရင် မန်ကျီးရွက်ကလေးတွေ အစီအရီ အထပ်ထပ်နေသလိုမို့၊ မန်ကျီးရွက်ထပ် အခြေပါတဲ့ နဘေ လို့ခေါ်တဲ့ ကာရန်ကို နိုင်နိုင်နင်းနင်း သုံးထားတာကို တွေ့ရပါလိမ့်မယ်။
“နှစ်တရာ၊ ချစ်ရှာသင့်သူမို့၊ သစ္စာနှင့်မြွက်မယ်၊ မေတ္တာဖြင့် ပန္နက်ရွယ်တယ်၊ တသက်ဝယ်ယုံတမ်း။”
“ညရုံတော် အခြေပျက်စေဖို့၊ ရွှေလက်နဲ့ဆွဲကာ၊ ပွေရက်ပေ့ ပုလဲညှာရယ်၊ ကဲပါပေ့ဘုရား။”
အချုပ်တန်းဆရာဖေ
အဲဒီလို မန်ကျီးရွက်ထပ် နဘေ နဲ့ မေတ္တာဘွဲ့တွေ ရေးခဲ့တယ်။ နုနုရွရွ အလှအပတွေရေးတဲ့ စာဆို ဖြစ်ပေမယ့်လည်း၊ တချိန်ကျတော့ တော်လှန်တဲ့စာဆိုဘဝကိုရောက်ခဲ့တယ်။ ဂမ္မဒေါသကို ရှောင်လေ့ရှိတဲ့ ဆရာဖေလည်း ကိုယ့်အမျိုးသားတွေ ကောင်းစေချင်တဲ့ စေတနာနဲ့ ခပ်ကြမ်းကြမ်း၊ ထိထိမိမိ စာတွေ ရေးလာခဲ့ရ တော့တယ်။
ကျူးကျော်လာတဲ့ နယ်ချဲ့ကိုတော်လှန်ဖို့က မျိုးချစ်တွေရဲ့ ဘဝပေးတာဝန်ဖြစ်တယ်လို့ ခံယူထားသူတွေမှာတော့၊ မြန်မာပြည် တပြည်လုံး နယ်ချဲ့လက်အောက်ကို လုံးလုံးလျားလျား မကျရောက်ခင်ကတည်းက နည်းအမျိုးမျိုးနဲ့ နယ်ချဲ့ကို ဆန့်ကျင်နေခဲ့ကြပြီ။ ဆရာဖေလည်း ကလောင်လက်နက်ကိုကိုင်စွဲလို့ တဖက်တလမ်းက ပါဝင်ခဲ့တယ်။ နယ်ချဲ့ရဲ့ ကလိမ်ကညစ် အကျင့်ဆိုးတွေကို ဖော်ထုတ်ထောက်ပြခဲ့တယ်။ ဇာတိသွေး ဇာတိမာန်တွေ တက်ကြွကြဖို့ လှုံ့ဆော်ခဲ့တယ်။
မြင်ကွန်း၊ မြင်းခုန်တိုင် အရေးအခင်းဖြစ်တော့ ကလောင်ကိုင်ရုံတင်မကဘဲ၊ ဓားပါကိုင်ခဲ့ရတယ်။ မက္ခရာမင်းသား က မင်းတုန်းမင်းကိုကယ်တင်တဲ့အခါမှာ နောက်ပါးက လိုက်ပါခဲ့တယ်။၊ ကနောင်မင်းရဲ့သားတော်၊ ပတိမ်းစား သူပုန်ထတဲ့အခါ ပလိပ်စစ်ကြောင်းအတိုင်း၊ ညောင်ရမ်းမင်းသားရဲ့တပ်က သူပုန်တပ်တွေကို ရှင်းလင်းတဲ့ အခါမှာလည်း ပါဝင်တိုက်ခိုက်ခဲ့တယ်။
မင်းတုန်းမင်းလက်ထက်မှာ အိန္ဒိယဘုရင်ခံချုပ်လာလည်တော့ မင်းအမိန့်နဲ့ ရန်ကုန်မြို့ကို ဆရာဖေနဲ့ ယင်းတော်မလေးတို့က သွားပြီး ကြိုဆိုဖျော်ဖြေရတယ်။ အဲဒီမှာ မြန်မာတွေ အထွဋ်အမြတ်ထားတဲ့ နန်းသုံး ထီးဖြူ နှစ်လက်မိုးပြီး ဘုရင်ခံချုပ်ကိုကြိုဆိုတာမြင်ခဲ့ရတော့၊ မတန်ရာကို အလုပ်ခိုင်းရမလားလို့ သုံးခွင့်ပြုတဲ့ဘုရင်ကိုပါ စိတ်နာပြီးပြန်ခဲ့ရတယ်။ နောက်တလကြာတော့ အဲဒီဘုရင်ခံချုပ်လည်း ‘ပို့ဘလဲ’ ဆိပ်ကမ်းမြို့မှာ အကျဉ်းစခန်း တခုကို စစ်ဆေးနေတုန်း၊ အကျဉ်းသားတဦးရဲ့လက်ချက်နဲ့ ကွယ်လွန်တယ်။ ဆရာဖေက တပြည်လုံးကျော်တဲ့ တေးထပ်တပုဒ် ရေးခဲ့တယ်။
“ပိတ်ရှာပြီ ဇီဝိ၊ ဘုန်းမတန့် ဘုန်းတန့်ကြံတယ်၊ ဆုံးရုပ်နမ် သွားပေါ့ ဝီဇိ၊ မင်းတုတု ခွေးသေ သေ၊”
အချုပ်တန်းဆရာဖေ
အဲဒီတေးထပ်ကို ဘယ်လောက်လူကြိုက်များသလဲဆိုရင်၊ ဇာတ်အဖွဲတွေက ‘မိစ္ဆာကောင် ဓားထိုးဇာတ်’ နာမည် တပ်လို့ ဇာတ်လမ်းဆင်ပြီး ဆိုကြ၊ ပွဲကကြတဲ့အထိပါပဲ။ တေးထပ်ရဲ့ ထူးခြားချက်က တေးထပ်လို ဆိုချင်ဆို၊ ဒါမှမဟုတ် ဗုံထောက်သံ နဲ့ ဝိုင်းဖွဲပြီးဆိုလို့လည်းရအောင် ရေးထားတာပါပဲ။
ကျော်လွန်းမက ကျော်လာတော့၊ နယ်ချဲ့ အရာရှိတွေက မခံချိမခံသာဖြစ်ကြပြီး၊ စာရေးတဲ့သူကို အရေးယူပါ၊ ပွဲတွေမှာလည်း မကပြစေပါနဲ့ ဆိုပြီး အတိုင်ခံရပါလေရော။ နောက်ဆက်တွဲရလဒ်ကတော့ ဘုရင်ခံချုပ်ကို သိက္ခာ ကျစေတဲ့စာရေးတဲ့အမှုနဲ့ ဆရာဖေ အကျဉ်းကျခံရလေတယ်။ အောက်မြန်မာပြည်ကို သိမ်းထားတဲ့ နယ်ချဲ့ကျူးကျော်သူကို အထက်မြန်မာပြည်ဘုရင်က မျက်နှာသာပေးပြီး မဟာမိတ်လုပ်နေရချိန်ဆိုတော့၊ အကျယ်အကျယ် မငြိမ်းဖွယ် မဖြစ်စေချင်တာကြောင့် ကိုယ့်လူကို ကိုယ်တိုင်အရေးယူရတာမျိုး ဖြစ်နိုင်ပေမယ့်၊ ဆရာဖေ ခမျာ နှစ်ခါနာရပြန်တော့တယ်။
တေးထပ်တပုဒ်ကို အချုပ်ထဲမှာရေးပြီး၊ မိတ်ဆွေရင်း ဗြဲတိုက်စာရေး ဦးထွန်းဝ ကတဆင့်၊ ရွှေတိုက်ဝန်မင်း ဆောင်ကြဉ်းပေးလို့ မင်းတုန်းမင်းကြီးက ကြားနာရတယ်။
“သမုတိအတွက် ငဝက်က ဒဏ်ခံ၊
အထက်က အတန်တန်ကို ရွှေနန်းစံမသိ၊
ရှစ် ခုနှစ် တောင်မျက်နှာတွင်၊ မက္ခရာမင်းနှင့်ပါရှိ၊
ပလိပ်ကြောင်း အောင်ပန်းချွေ မောင်ထမ်းချေစေဘိ၊
ညောင်ရမ်း ဆွေရဝိက၊ ပကတိ သက်သေ၊
ရန်သူတော် ရွှေဘိုဘွား၊ ဖေကိုယ်စား တိုက်ခဲ့ရပေ၊”
“ယခုဖြင့် ကောင်းမွေလန်တယ်၊ ဆိုးမွေခံ ထိပ်တုံးနှင့်လေး။”
အချုပ်တန်းဆရာဖေ
အဲဒီတေးထပ်ကြောင့် ဆရာဖေ အချုပ်ကလွတ်ခဲ့ရပါတော့တယ်။ အချုပ်က လွတ်စေတဲ့ တေးထပ်ဆိုပြီး ကျော်ကြားခဲ့ပြန်တယ်။ မကြာခင်မှာပဲ၊ မင်းတုန်းမင်းကြီးရဲ့ လေသာဆောင်မှာ အဆောင်တော်မြဲ ရာထူးနဲ့ အမှုထမ်းခွင့်ရခဲ့တယ်။
ဆရာဖေရဲ့ ပုဆိုး ခါးတောင်းကျိုက်အကြောင်း ရယ်သွမ်းသွေးခဲ့ဖူးတဲ့ စလေဦးပုညကတော့ မြင်ကွန်း၊ မြင်းခုန်တိုင် မင်းသားတွေကို အခါပေးတဲ့အမှုနဲ့ ရာဇဝတ်သင့်ပြီး၊ ခေတ္တ ထိန်းသိမ်းထားခံရတုန်း၊ မြို့ဝန်ဦးသာအိုး လက်ထဲမှာ လူကိုခွေးသတ်လို့ ဘဝဆုံးခဲ့ရရှာတယ်။ စာဆိုပြိုင်ဖက်ချင်းဖြစ်ခဲ့ပေမယ့်၊ ဘဝတူ စာပေပညာရှင်တဦးကို မလိုမုန်းထား အမျက်ပွားတာသက်သက်ကြောင့် အဆုံးစီရင်လိုက်တဲ့အချက်ကို ဆရာဖေက မကျေနပ်နိုင်ခဲ့ပါ။ ကိုယ့်ထက် အင်အားကြီးသူဆိုတော့လည်း နီးရာဓားကိုကြောက်ရလို့ ပြန်မပြောသာတဲ့အကြောင်းကို ရေးပြ လိုက်ပါသေးတယ်။
“ဟုတ်သလို ပြန်မမြွက်သာဘူး၊ တုတ်တပြက် ဓားပါ၊ ရုတ်တရက် ခြားမကွာသည်၊ အနားမှာ လက်ငင်း၊”
“သတိ နဲ့ပညာကို၊ စဉ်မကွာ မှန်ထားမှ၊ ရန်ပါးမည့်ခုအခါ၊ နှောဘို့သင့်စွာ၊
သဘောလိုက် မပြောသာသည်၊ ယောဆရာ လုပ်စမ်းချင့်လေး။”
အချုပ်တန်းဆရာဖေ
No comments:
Post a Comment